هدوى محمود تكتب/ مش كل اللي اتربى كويس يطلع كويس… ومش كل اللي اتربى لوحده يبقى وحش

هدوى محمود تكتب/ مش كل اللي اتربى كويس يطلع كويس… ومش كل اللي اتربى لوحده يبقى وحش

بصراحة كده… كل يوم بشوف مواقف بتأكدلي إن التربية مش بس بيت ولا عيلة ولا عدد أفراد حواليك. فيه ناس اتربّوا وسط أهل محترمين ومتعلمين، واتفتح لهم كل باب، ومع ذلك أخلاقهم بتقف عند أول اختبار… لا احترام، ولا كلمة مظبوطة، ولا حتى ضمير يوقفهم.

وفي المقابل… فيه ناس ما كانش حواليهم حد، ولا لاقوا اللي يفهمهم الصح من الغلط، ومع ذلك كبروا باحترام، وطلّعوا من نفسهم أحسن نسخة قدروا عليها.
ليه؟
عشان في النهاية الأصول قرار… مش وراثة.

أنا مؤمنة بحاجة:
الشخص الحقيقي بيتعرف من مواقفه… مش من بيئته.
فيه حد تلاقيه من بيت كله قيم، لكن هو اختار يكون غير كده. وفيه حد تاني الظروف كانت ضده ومع ذلك اختار يكون بني آدم محترم ومتعلم من المدرسة الوحيدة اللي ما بتكذبش… “مدرسة الحياة”.

الأصل الحقيقي مش لقب ولا عيلة ولا اسم…
الأصل إنك تكون ثابت… ما تكسرش حد… وما تاخدش حق مش حقك… وتعرف تتصرف بإنسانية حتى لو محدش علمهالك.

وعشان كده لما بشوف حد متربي كويس بس تصرفاته تقول العكس، بقت الحقيقة واضحة بالنسبة لي:
مش كل الناس اللي اتربّت صح طلعت صح… وفي ناس ربّت نفسها وبقت عشرة مرات أحسن.
لأن اللي ما عندوش أصل… مش هتعمله أصل.
واللي عنده أصل… مش هتعرف الظروف تغيّره